जी. एच. रायसोनी कनिष्ठ महाविद्यालयात दहावीच्या विद्यार्थ्यांसाठी करिअर मार्गदर्शन सत्र उत्साहात

बोर्ड परीक्षेची तयारी, योग्य विषय निवड आणि भविष्यातील करिअर संधींबाबत तज्ज्ञांचे मार्गदर्शन

जळगाव, ता. १४ : विद्यार्थ्यांना दहावीच्या परीक्षेत उत्तम यश मिळविण्यासोबतच भविष्यातील करिअरची योग्य दिशा निवडता यावी, या उद्देशाने जी. एच. रायसोनी कनिष्ठ महाविद्यालय, जळगाव येथे महात्मा गांधी माध्यमिक व उच्च माध्यमिक विद्यालय, सामनेर येथील इयत्ता दहावीच्या विद्यार्थ्यांसाठी विशेष करिअर मार्गदर्शन सत्राचे आयोजन करण्यात आले. या उपक्रमात विद्यार्थ्यांना बोर्ड परीक्षेची प्रभावी तयारी, स्वतःच्या क्षमतांची ओळख, अकरावीमध्ये योग्य शाखेची निवड आणि बदलत्या काळातील करिअरच्या संधी यांविषयी सविस्तर मार्गदर्शन करण्यात आले.

या कार्यक्रमाचे उद्घाटन जी. एच. रायसोनी कनिष्ठ महाविद्यालयाच्या प्राचार्या प्रा. सोनल तिवारी यांच्या प्रेरणादायी मार्गदर्शनाने झाले. त्यांनी विद्यार्थ्यांना विविध करिअर संधी, आवड आणि क्षमतेनुसार योग्य विषयांची निवड करण्याचे महत्त्व तसेच स्पर्धात्मक परीक्षांची तयारी कशी करावी, याबाबत सविस्तर माहिती दिली. दहावीचे वर्ष हे विद्यार्थ्यांच्या शैक्षणिक वाटचालीतील महत्त्वाचे वळण असून, या टप्प्यावर योग्य नियोजन, सातत्यपूर्ण अभ्यास आणि स्पष्ट ध्येय निश्चित करणे आवश्यक असल्याचे त्यांनी अधोरेखित केले.

यावेळी प्रा. रफिक शेख आणि प्रा. राहुल यादव यांनी विद्यार्थ्यांशी संवाद साधत करिअर मार्गदर्शन सत्र घेतले. बोर्ड परीक्षेत चांगले गुण मिळविण्यासाठी अभ्यासाचे नियोजन, वेळेचे व्यवस्थापन, नियमित सराव आणि आत्मविश्वास यांचे महत्त्व त्यांनी समजावून सांगितले. तसेच विद्यार्थ्यांनी स्वतःच्या आवडी, कौशल्ये आणि बलस्थानांची ओळख करून त्यानुसार शैक्षणिक व व्यावसायिक क्षेत्राची निवड करावी, असा सल्ला दिला.

दहावीनंतर विज्ञान, वाणिज्य आणि कला या शाखांमधील उपलब्ध संधी, बारावीनंतरचे विविध शैक्षणिक पर्याय, स्पर्धात्मक परीक्षांचे स्वरूप तसेच सध्याच्या काळातील उदयोन्मुख करिअर क्षेत्रांविषयी विद्यार्थ्यांना मार्गदर्शन करण्यात आले. विद्यार्थ्यांच्या मनातील शैक्षणिक व करिअरविषयक प्रश्नांना उत्तरे देत हे सत्र संवादात्मक आणि उपयुक्त बनविण्यात आले.

या उपक्रमात महात्मा गांधी माध्यमिक व उच्च माध्यमिक विद्यालय, सामनेर येथील एकूण ४७ विद्यार्थ्यांसह शाळेचे मुख्याध्यापक आणि तीन शिक्षक सहभागी झाले होते. मार्गदर्शन सत्रानंतर विद्यार्थ्यांनी जी. एच. रायसोनी कनिष्ठ महाविद्यालयाच्या संपूर्ण परिसराला भेट दिली. यावेळी महाविद्यालयातील आधुनिक पायाभूत सुविधा, शैक्षणिक वातावरण आणि विद्यार्थ्यांच्या सर्वांगीण विकासासाठी उपलब्ध असलेल्या विविध वैशिष्ट्यांची माहिती त्यांना देण्यात आली. महाविद्यालयातील सुविधा आणि शैक्षणिक उपक्रम पाहून विद्यार्थ्यांसह शिक्षकांनी समाधान व्यक्त केले.

विद्यार्थ्यांना गुणवत्तापूर्ण शिक्षणासोबतच योग्य करिअरची दिशा मिळावी आणि भविष्यातील संधींची जाणीव व्हावी, या उद्देशाने जी. एच. रायसोनी कनिष्ठ महाविद्यालयातर्फे हा उपक्रम राबविण्यात आला. या संपूर्ण उपक्रमाचे समन्वय प्रा. संदीप पाटील, प्रा. मीनाक्षी पाटील आणि अनिल सोनार यांनी केले. या उपक्रमाच्या यशस्वी आयोजनाबद्दल जी. एच. रायसोनी कनिष्ठ महाविद्यालयाच्या संचालिका श्रीमती पलकजी रायसोनी यांनी प्राचार्या प्रा. सोनल तिवारी तसेच मार्गदर्शक प्राध्यापकांचे अभिनंदन केले. विद्यार्थ्यांना योग्य वेळी करिअरविषयक मार्गदर्शन मिळणे त्यांच्या उज्ज्वल भविष्यासाठी महत्त्वाचे असल्याचे त्यांनी नमूद केले.