राष्ट्रीय क्रीडा दिन”निमित्त जी. एच. रायसोनीत क्रीडामहोत्सव

मेजर ध्यानचंद यांच्या स्मृतिदिनानिमित्त विविध खेळांचे रंगतदार आयोजन ; उत्कृष्ट कामगिरी केलेल्या खेळाडूंचा सन्मान

जळगाव, ता. २९ : शिरसोली रस्त्यावरील जी. एच. रायसोनी महाविदयालय व सावखेडा परिसरातील जी. एच. रायसोनी पब्लिक स्कूल येथे हॉकी खेळाडू मेजर ध्यानचंद यांच्या जयंती निमित्त ‘राष्ट्रीय क्रीडा दिन’ साजरा करण्यात आला. तसेच याप्रसंगी स्कूल व महाविद्यालयात राष्ट्रीय - आंतरराष्ट्रीय स्तरावर उत्कृष्ट कामगिरी केलेल्या क्रीडापटूंचा सत्कार करण्यात आला. सुरवातीस महाविध्यालयात अकॅडमिक डीन प्रा. डॉ. संजय शेखावत व जी. एच. रायसोनी कनिष्ठ महाविद्यालयाच्या प्राचार्या सोनल तिवारी यांनी मेजर ध्यानचंद यांच्या प्रतिमेस पुष्पहार अर्पण करून अभिवादन केले. तसेच विध्यार्थ्यांना मार्गदर्शन करतांना त्यांनी नमूद केले कि, मेजर ध्यानचंद यांचा जन्मदिन देशभरामध्ये राष्ट्रीय क्रीडा दिन म्हणून उत्साहात साजरा केला जात आहे. त्यानिमित्ताने शारीरिक स्वास्थ्य चांगले राहण्यासाठी प्रत्येक विद्यार्थी व नागरिक यांनी आपल्या जीवनामध्ये मैदानी खेळाला महत्त्व दिले पाहिजे. विविध खेळ खेळल्यामुळे शारीरिक व मानसिक स्वास्थ्य चांगले राहते. यश-अपयश पचवण्याची ताकद व्यक्तीमध्ये येते. चांगले आरोग्य हीच सर्वांची संपत्ती आहे हे आरोग्य चांगले राहण्यासाठी सर्वांनी दिवसभरातून किमान एक तास तरी खेळ खेळले पाहिजे असे मनोगत त्यांनी व्यक्त केले. यानंतर जी. एच. रायसोनी पब्लिक स्कूलच्या मुख्याध्यापिका क्रिस्टाबेल परेरा यांनी विद्यार्थी व्यक्तिमत्व विकास, खेळाडूंची मानसिकता आणि खेळाडू कसे घडावेत यासाठी आजपर्यंत जी. एच. रायसोनी पब्लिक स्कूलने केलेल्या प्रयत्नांची यशोगाथा मांडली. स्कूलच्या प्रत्येक विद्यार्थ्याने नियमित व्यायाम करणे आवश्यक आहे. अभ्यासाबरोबरच मैदानी खेळ आणि व्यायामाची आवश्यकता असून मेजर ध्यानचंद यांनी ज्या समर्पित भावनेने खेळासाठी स्वतःला झोकून दिले तशी समर्पणाची भावना प्रत्येक विद्यार्थ्यांनी आपल्या अंगात भीनवावी असे प्रतिपादन त्यांनी यावेळी केले. रिचर्ड पिंटो व सिमरन सचदेवा यांनी विद्यार्थ्यांचे प्रतिनिधित्व करत क्रीडा दिनाचे महत्व सांगितले. यावेळी कार्यक्रमात बीटेक तृतीय वर्षाचा विद्यार्थी प्रथमेश गोसावी याने खेळाडूंची प्रार्थना व शपथ देऊन क्रीडामहोत्सवाचा शुभारंभ केला याप्रसंगी महाविध्यालय व स्कूलमध्ये विविध क्रीडा स्पर्धा घेत क्रीडा दिन मोठ्या उत्साहाने साजरा करण्यात आला. या कार्यक्रमाचे समन्वय क्रीडासंचालक सागर सोनवणे व क्रीडाशिक्षक आशा पाटील तसेच स्कूलचे अनंत मुर्गद यांनी साधले तर कार्यक्रमाच्या यशस्वीतेसाठी सर्व शिक्षक व शिक्षकेतर कर्मचारी यांनी सहकार्य केले. सदर कार्यक्रमाचे यशस्वीरीत्या आयोजन केल्याबद्धल जी. एच. रायसोनी इस्टीट्युटचे अध्यक्ष श्री. सुनीलजी रायसोनी, संचालिका प्रा. डॉ. प्रिती अग्रवाल व जी. एच. रायसोनी पब्लिक स्कूलच्या संचालिका सौ. पलक रायसोनी यांनी अभिनंदन केले.