जी. एच. रायसोनी पब्लिक स्कूल येथे “आंतरराष्ट्रीय योग दिन” उत्साहात साजरा

जळगाव, ता. २३ : योग ही भारताची प्राचीन व वैभवशाली परंपरा आहे. योगशास्त्राचे महत्त्व संपूर्ण जगाने ओळखले असून आरोग्यासाठी योग साधनेचे महत्व लक्षात घेता अकराव्या जागतिक योग दिनानिमित्त पंतप्रधान नरेंद्र मोदींच्या योगा फॉर वन अर्थ, वन हेल्थ या संकल्पनेतून जी. एच. रायसोनी पब्लिक स्कूल येथे योग दिन साजरा करण्यात आला. 

जी. एच. रायसोनी पब्लिक स्कूल मध्ये सातत्याने विद्यार्थ्यांना योग प्रशिक्षण देऊन दरवर्षी हा दिवस साजरा केला जातो.  योगाभ्यास नियमित केल्यामुळे मन व शरिराकरिता भरपूर फायदे होतात. योगदिनाचे महत्त्व लक्षात घेता स्कूलच्या प्रांगणात योग दिन उत्साहात साजरा करण्यात आला. विद्यार्थ्यांनी उत्कृष्टरित्या विविध आसने, ओंकार करून आंतरराष्ट्रीय योगदिनास आपला सक्रिय सहभाग नोंदविला. विद्यार्थ्यांसाठी आयोजित या उपक्रमास योगप्रशिक्षक श्री. जगदीशकुमार कुंदनदास वैष्णव यांचे मार्गदर्शन लाभले. कार्यक्रमाची सुरुवात सरस्वती पूजनाने करण्यात आली. आपल्या मार्गदर्शनात वैष्णव यांनी ‘मनाची एकाग्रता, ताण तणावाचे नियोजन व सुदृढ शरीर संपदेसाठी योगाभ्यास महत्वाचा आहे त्यासाठी  विद्यार्थ्यांनी योगाभ्यासात सातत्य ठेवावे’ असे सांगितले. या कार्यक्रमाप्रसंगी जी. एच. रायसोनी पब्लिक स्कूलच्या मुख्याध्यापिका श्रीमती क्रिस्टाबेल परेरा यांनी देखील  योगाभ्यासाचे महत्त्व विशद  केले. कार्यक्रमाचे सूत्रसंचालन व प्रास्ताविक शाळेतील शिक्षिका श्रीमती लीना त्रिपाठी यांनी केले. सदर कार्यक्रमाचे यशस्वीरीत्या आयोजन केल्याबद्धल जी. एच. रायसोनी पब्लिक स्कूलचे संचालक श्री. श्रेयसजी रायसोनी यांनी अभिनंदन केले.