यशस्वी विध्यार्थ्यामुळेच महाविद्यालयाचे नाव मोठे होते : संचालिका प्रा. डॉ. प्रिती अग्रवाल

जी. एच. रायसोनी महाविध्यालयात माजी विद्यार्थी मेळावा उत्साहात संपन्न, विध्यार्थ्यांचा मोठ्या संख्येने सहभाग

जळगाव, ता. २६  : विद्यार्थी हे देशाचे भविष्य आहे. येणारी प्रत्येक पिढी पुढच्या पिढीचे अनुकरण करत असते. त्यामुळे तुमचा आदर्श सगळ्यांनी घ्यावा, अशी कामगिरी तुम्ही तरुण करीत आहातच पण आयुष्यातील ध्येय हे नेहमी मोठे असावे, त्यासाठी कठोर परिश्रम घेण्याची तयारी आवश्यक आहे. विद्यार्थ्यांनी परिश्रम करून मिळवलेले यश हेच महत्त्वाचे असते,  आणि त्यामुळे आई-वडील व महाविद्यालयाचे नाव मोठे होते. मुळात नव्या पिढीतील तरुणांनी आपल्या अंगी असलेल्या चांगल्या गुणांची जाणीव करून घेणे आवश्यक आहे. तसेच व्हाॅटसअप, फेसबुकच्या जमान्यात अशा स्नेह मेळाव्याचे आयोजन म्हणजेच स्नेहबंधनाचा मेळ होय. अशा मेळाव्याच्या माध्यमातून प्राध्यापक, विध्यार्थी व महाविध्यालय यांचे ऋणानुबंध नेहमीच टिकून राहतात. खानदेशातील जी. एच. रायसोनी महाविध्यालय हे पहिलेच मॅनेजमेट व अभियांत्रिकी क्षेत्रातील ऑटोनॉमस महाविध्यालय असून नॅककडून रायसोनी महाविद्यालयाला स्वायत्ततेचा दर्जा प्राप्त झाला असून नॅक “ए” ग्रेडनेही आपले इस्टीट्यूट सन्मानित आहे त्यामुळे येणाऱ्या काळात आपल्या भागातील विध्यार्थ्यांना याचा मोठा फायदा होईल असे प्रतिपादन रायसोनी इस्टीट्यूटच्या संचालिका प्रा. डॉ. प्रिती अग्रवालयांनी जी. एच. रायसोनी कॉलेज ऑफ इंजीनियरिंग अँड मॅनेजमेंट महाविद्यालयातील ‘नॉस्टेलजिया-२०२४’ या कार्यक्रमांतर्गत मॅनेजमेट व अभियांत्रिकी या शाखेतील पदवी व पदव्युत्तर शाखेतील माजी विद्यार्थ्यांच्या स्नेह मेळाव्यात केले.

याप्रसंगी सुरुवातीला दीपप्रज्वलन करून सरस्वती मातेचे पूजन करण्यात आले. यावेळी रायसोनी इस्टीट्यूटच्या संचालिका प्रा. डॉ. प्रिती अग्रवाल यांनी उपस्थित माजी विध्यार्थ्यांचे स्वागत करत जी. एच. रायसोनी इस्टीट्यूटच्या विविध यशस्वी कार्याची माहिती दिली तसेच भावी आयुष्यासाठी माजी विध्यार्थ्यांना शुभेच्छा दिल्या. यावेळी रायसोनी महाविद्यालयातील म्युझिक क्लब च्या विध्यार्थ्यानी विविध गीते सादर करत उपस्थितांची मने जिंकलीत. तसेच एल्यूमनी फाउंडेशन समन्वयक प्रा.तन्मय भाले यांनी जी. एच. रायसोनी एल्यूमनी फाउंडेशनच्या विविध कार्यावर प्रकाश टाकत माजी विध्यार्थ्यांच्या सर्वांगीण विकासासाठी एल्यूमनी फाउंडेशन विविध कार्यक्रम राबवीत असल्याचे सांगितले तसेच इस्टीट्यूट व माजी विध्यार्थी कनेक्ट कसे राहतील यावरही सतत काम सुरु असल्याचे त्यांनी सांगितले. यावेळी या कार्यक्रमाचे समन्वयक प्रा. रफिक शेख, प्रा. डॉ. सोनल पाटील, प्रा. डॉ. योगिता पाटील व सर्व विभागाचे विभागप्रमुख तसेच अकॅडमिक डीन प्रा. डॉ. संजय शेखावत व प्राध्यापक उपस्थित होते.

 

माजी विध्यार्थ्यानी व्यक्त केल्या भावना

मे‌ळाव्याच्या निमित्ताने परत एकदा एकत्र आलेले सर्व माजी विद्यार्थी आपल्या जुन्या आठवणीत हरवून गेले होते. 'प्रत्येकजण आपले महाविध्यालय आता कसे आहे, हे डोळ्यांमध्ये साठवून घेत होते. वर्ग मित्र पुन्हा भेटल्याचा आनंद सर्वांच्याच चेहऱ्यावर दिसत होता. यावेळी काहींनी महाविध्यालयात मिळालेले शिक्षण व प्राध्यापकांनी दिलेले मूलमंत्र आपल्या जीवनात किती उपयोगी येत आहेत, याचे सकारात्मक अनुभव कथन केले. तसेच राहुल त्रिवेदी, सौरभ जैन, पियुष पाटील या माजी विध्यार्थ्यानी रायसोनी मंडी, नेटवर्क लंच, पिनेकल या सारख्या उपक्रमातून आमचा सर्वांगीण विकास होऊ शकला. त्याचप्रमाणे प्लेसमेंट विभागाच्या माध्यमातून नामवंत कंपन्यामध्ये करियर घडविण्याची व उद्योजक होण्याची संधी मिळाली असे मत त्यांनी व्यक्त केले व रायसोनी इस्टीट्यूटने या मेळाव्याचे यशस्वीरीत्या आयोजन केल्याबद्धल विध्यार्थ्यानी संचालिका प्रा. डॉ. प्रिती अग्रवाल यांच्याजवळ इस्टीट्यूटचे आभार व्यक्त केले.

 

“माजी विद्यार्थी मंच” स्थापन

संस्थेचे माजी विद्यार्थी, प्राध्यापक, कर्मचारी आणि विद्यार्थी यांच्यात दुवा प्रस्थापित करण्यासाठी आणि संस्थेच्या मागील काळातील आणि सध्याच्या विद्यार्थ्यांमध्ये सुसंवाद साधण्यासाठी माजी विद्यार्थ्यांच्या या स्नेह मेळाव्यात माजी विद्यार्थी मंच स्थापन करण्यात आला. या मंचमध्ये अध्यक्ष : राहुल त्रिवेदी, उपाध्यक्ष : तालह देशमुख, सचिव : निरंजन देशमुख, उपसचिव : अतुल भुयार, खजिनदार : अमित जैन व १० इतर सदस्यांची निवड करण्यात आली.

 

“उत्कृष्ट कामगिरी” पुरस्कार

आयोजित करण्यात आलेल्या या माजी विद्यार्थ्यांच्या मेळाव्यात एमसीए विभागातील सौरभ जैन, एमबीए विभागातील राहुल त्रिवेदी, प्राची जगवानी, योगिता पाटील व अभियांत्रिकी विभागातील निलेश अत्तरदे, पियुष पाटील तसेच तलह देशमुख या विद्यार्थ्यांनी विविध क्षेत्रात केलेल्या उत्कृष्ट कामगिरीसाठी त्यांना “आउटस्टैंडिंग अचीवमैंट अवार्ड” देऊन त्यांचा गौरव करण्यात आला.