“जी. एच. रायसोनी करंडक” या राज्यस्तरीय एकांकिका स्पर्धेचा बिगुल वाजला : २४ सप्टेंबरपर्यंत नोंदणीची अट

१० ऑक्टोबरला जळगावात रंगणार प्राथमिक फेरी ; १ लाख ११ हजारांचे पहिले पारितोषिक

जळगाव, ता. ११ : जी.एच. रायसोनी स्पोर्ट्स अँड कल्चरल फाउंडेशनच्या वतीने आयोजित जी.एच. रायसोनी करंडक राज्यस्तरीय आंतरमहाविद्यालयीन एकांकिका स्पर्धेची प्राथमिक फेरी जळगाव येथे १० ऑक्टोंबरला आयोजित करण्यात आली आहे. शिरसोली रस्त्यावरील जी. एच. रायसोनी कॉलेज ऑफ इंजीनियरिंग अँड मॅनेजमेंट महाविद्यालय या ठिकाणी सकाळी १०.३० वाजता स्पर्धेची प्राथमिक फेरी सुरू होईल. तालीम पद्धतीने प्राथमिक फेरीचे आयोजन करण्यात आले असून यावेळी नेपथ्य, वेशभूषा, रंगभूषेचा वापर अनिवार्य नसेल. तसेच यावेळी लाईट्स आणि लेव्हल्सही पुरविण्यात येणार नाही. ही फेरी पूर्णपणे तालीम स्वरुपात होणार आहे. स्पर्धक संघांनी संहितेच्या दोन प्रती आणि डीआरएमची पावती प्राथमिक फेरीतील प्रयोगापूर्वीच द्यायचे आहे. स्पर्धक संघाने एक तास आधी केंद्रावर रिपोर्टींग करणे अनिवार्य आहे. ही स्पर्धा पूर्णपणे मराठी भाषेतील एकांकिकांसाठी आहे. जे कलावंत प्राथमिक फेरीत काम करतील तेच कलावंत अंतिम फेरीतही असणे अनिवार्य आहे. ऐनवेळी कलावंत बदलता येणार नाही तसेच प्राथमिक फेरीत सहभागी होणाऱ्या एकांकिकांना आकर्षक बक्षिसे जिंकण्याची संधी देखील मिळणार असल्याचे आयोजकांनी कळविले आहे.

प्राथमिक फेरीत अव्वल ठरणाऱ्या तिन्ही एकांकिकांना अंतिम फेरीत प्रवेश मिळणार आहे. अंतिम फेरी १,२,३ व ४ फेब्रुवारी २०२५ ला नागपूर येथे होणार असून अंतिम फेरीत १ लाख ११ हजार रुपये प्रथम, ७१ हजार रुपये द्वितीय, ५१ हजार रुपये तृतीय तर २१ हजार उत्तेजनार्थ प्रथम व द्वितीय संघाना पुरस्कार दिला जाणार आहे. याशिवाय व्यक्तिगत व उत्तेजनार्थ पुरस्कारही दिले जातील. प्राथमिक फेरीत प्रवेशासाठी इच्छुक महाविद्यालयांना ५०० रुपये प्रवेश शुल्क भरायचे आहे. या स्पर्धेचा प्रवेश अर्ज तसेच नियमावली https://ghraisonikarandak.com/ या संकेतस्थळावर उपलब्ध आहे. या राज्यस्तरीय एकांकिका स्पर्धेत उत्तर महाराष्ट्रातील असंख्य महाविद्यालयांनी सहभागी होण्याचे आवाहन जी. एच. रायसोनी इन्स्टिट्यूटच्या संचालिका प्रा. डॉ. प्रिती अग्रवाल, अॅकेडमिक डीन प्रा. डॉ. संजय शेखावत, जी. एच. रायसोनी करंडकच्या मुख्य समन्वयिका मृणाल नाईक व टीम यांच्या वतीने करण्यात आले आहे तर स्पर्धेसंदर्भात अधिक माहितीसाठी जळगाव प्राथमिक फेरीचे समन्वयक बापूसाहेब पाटील यांच्या ९१७५७५८६३० यांच्याशी किंवा ८००७६८४९६० या क्रमांकांवर संपर्क साधता येईल.