जी. एच. रायसोनी पब्लिक स्कूल व महाविध्यालयात “राष्ट्रीय क्रीडा दिन” उत्साहात साजरा

हॉकीचे जादुगर मेजर ध्यानचंद यांच्या आठवणींना उजाळा ; विविध खेळांचे आयोजन

जळगाव, ता. २९ : सावखेडा परिसरातील जी. एच. रायसोनी पब्लिक स्कूल व शिरसोली रस्त्यावरील जी. एच. रायसोनी महाविदयालय येथे हॉकी या खेळाचे खेळाडू मेजर ध्यानचंद यांच्या जयंती निमित्त ‘राष्ट्रीय क्रीडा दिन’ साजरा करण्यात आला. याप्रसंगी जी. एच. रायसोनी इस्टीट्यूटच्या संचालिका प्रा. डॉ. प्रिती अग्रवाल यांनी मेजर ध्यानचंद यांच्या प्रतिमेस पुष्पहार अर्पण करून अभिवादन केले. तसेच विध्यार्थ्यांना मार्गदर्शन करतांना त्यांनी नमूद केले कि, मेजर ध्यानचंद यांचा जन्मदिन देशभरामध्ये राष्ट्रीय क्रीडा दिन म्हणून उत्साहात साजरा केला जात आहे. त्यानिमित्ताने शारीरिक स्वास्थ्य चांगले राहण्यासाठी प्रत्येक विद्यार्थी व नागरिक यांनी आपल्या जीवनामध्ये मैदानी खेळाला महत्त्व दिले पाहिजे. विविध खेळ खेळल्यामुळे शारीरिक व मानसिक स्वास्थ्य चांगले राहते. यश-अपयश पचवण्याची ताकद व्यक्तीमध्ये येते. चांगले आरोग्य हीच सर्वांची संपत्ती आहे हे आरोग्य चांगले राहण्यासाठी सर्वांनी दिवसभरातून किमान एक तास तरी खेळ खेळला पाहिजे असे मनोगत त्यांनी व्यक्त केले. यानंतर जी. एच. रायसोनी पब्लिक स्कूलच्या मुख्याध्यापिका तेजल ओझा यांनी विद्यार्थी व्यक्तिमत्व विकास, खेळाडूंची मानसिकता आणि खेळाडू कसे घडावेत यासाठी आजपर्यंत जी. एच. रायसोनी पब्लिक स्कूलने केलेल्या प्रयत्नांची यशोगाथा मांडली. स्कूलच्या प्रत्येक विद्यार्थ्याने नियमित व्यायाम करणे आवश्यक आहे. अभ्यासाबरोबरच मैदानी खेळ आणि व्यायामाची आवश्यकता असून मेजर ध्यानचंद यांनी ज्या समर्पित भावनेने खेळासाठी स्वतःला झोकून दिले तशी समर्पणाची भावना प्रत्येक विद्यार्थ्यांनी आपल्या अंगात भीनवावी असे प्रतिपादन त्यांनी यावेळी केले. या कार्यक्रमासाठी अकॅडमिक डीन प्रा. डॉ. संजय शेखावत व जी. एच. रायसोनी कनिष्ठ महाविद्यालयाच्या प्राचार्या सोनल तिवारी यांनी राष्ट्रीय क्रीडा दिन का साजरा केला जातो याविषयी माहिती दिली. रिचर्ड पिंटो व सिमरन सचदेवा यांनी विद्यार्थ्यांचे प्रतिनिधित्व करत क्रीडा दिनाचे महत्व सांगितले. यावेळी स्कूलमध्ये ५० व १०० मीटर रनिंग स्पर्धा घेत क्रीडा दिन मोठ्या उत्साहाने साजरा करण्यात आला. या कार्यक्रमाचे समन्वय क्रीडासंचालक सागर सोनवणे व क्रीडाशिक्षक आशा पाटील तसेच गौरव शिरसाळे यांनी साधले तर कार्यक्रमाच्या यशस्वीतेसाठी सर्व शिक्षक व शिक्षकेतर कर्मचारी यांनी सहकार्य केले. सदर कार्यक्रमाचे यशस्वीरीत्या आयोजन केल्याबद्धल जी. एच. रायसोनी पब्लिक स्कूलच्या संचालिका सौ. पलक रायसोनी यांनी अभिनंदन केले.